I am a strategist and I tweet about Sudan, Business and a little bit of politics... Optimistic yet sarcastic متفائل لما غياظ و محب للنعيميه و ما وزير الزراعة
فسحه مع نور بنيتي ❤️
بيكبرن سريع البنيات ما شاء الله تبارك الله…
مهم الوالدين يحالو يطلعو مره مره مع ابن او بنت واحد/ه براهم… اثرها عظيم على الوالد/ه و الابن/ه
هاااا ناس كل عام و انتم بخير و تامين و لامين و مبسوطين و أمانيكم محققه و قروشكم كتيره خيركم وافر
الزاويه مختلفه عشان ما يقولو لي متصور بصينيه و بتاع 🤣
#العيد
#سلفي_الجلابية
قالت لي لما جدك خطبني من ابوي قلت لأبوي عندي شروط قام استغرب و غضب... قال لي شنو؟ قلت ليه ما يطلع صعب متل ابوه و يقهرني... قال ليها ان قهرك تعالي... قعدت معاه قريب ٦٠ سنه ما قهرني سندتو و سندني
يا جماعه ♥️♥️♥️
حبوبتي ميمونه ما بتحب الصور و ما بتضحك فيها عشان دي مياصه ساي...
يبدو أنه حسب ما فهمت اني ترشحت ضمن عدد من المرشحين لكن ما تم اختياري في الshort list الوصلت لحمدوك...
اللجنه اختارت من هم انسب من حيث الخبرة و الكفاءة و ربنا يوفقهم و يفتح عليهم و ان شاء الله بقيف معاهم بخبرتي و معرفتي...
شكرا لكم..
و كفى الله المؤمنين شر القتال 😅
#حنبنيهو
يقول لي يا خال و يا عم و يا ابوي كلو هين ولم ياكل معاي أي جمبه...
لكن زول ولا بعرفو في مستشفى الولادة يقول لي و الله يا حاج ما شاء الله لسه بتجيب عيال is too much
انا ماشي اشتري صبغة غارنييه باللون الكستنائي اللامع و بلاش مسخره معاكم 😢😢
#انا43
الامهات الواقفات في صفوف البنزين و عملن تجهيزات العيد و ودن اولادهن الحلاق وجابن الخروف و شايلات الشيله براهن لغياب الرجال(او لسجمهم)...
التحيه و الحب و التقدير و كل سنه و انتن طيبات و قويات ♥️🌹
في ناس يبدو انهم متضايقين من طريقتي في كتابه التويتات وانه دي طريقه ما مناسبه لي أو لقصة ترشيحي او لسني 😅
يا جماعه ده اسلوبي المرتاح ليه و طريقتي في الكلام العادية حتى لو لاقيتوني بصوره شخصية.
خيار عدم متابعتي متاح برضو و لكم كل الحب و الاحترام.
#أرخي_جسمك
الشعب السوداني ده لذيذ
اخوي كان جاي من السفر و أصحابو قررو يستقبلوه في المطار بيافطة مكتوب فيها مرحب ببطل البادمنقتون العالمي في بلده
و اول ما شافوه صفقو ليه و اتصورو معاه
المطار كله احتفل بيه و أتصور معاه
مع العلم انه كلهم ما عارفين ده شنو زاتو
وهو ما لعب الداهي دي اصلو 😂😂😂
د.حسام النصري:
"لا يمكن تنمية السودان إلا عبر تنمية الزراعة، ولا يمكن تنمية الزراعة إلا عبر تنمية المزارع البسيط"
"Sudan can only be developed through the development of agriculture, and agriculture can only be developed through the development of simple farmers"
_
@hussamnasri
قطعت تذكرة البنك و مشيت قعدت جمب الدكان مستني قمت سرحت و الرقم فات...
طوالي ربطت وش عمك الكبير الconfused داك... يا ولدي رقمكم ده ما ندهتوه ليه انا فترت مشيت قعدت هناك... قام قال لي بتاع الحرس اتفضل خش يا ابوي 😂😂
الشيب عمل شغل خصوصا مع نظرة الانسان الفتران ديك 😂😂😂
و الله يا جماعه القبول من الله سبحانه و تعالي و بشكركم كلكم شديد على الحب و الثقه الكبيره دي... اديتوني طاقه كبيره للشغل سواء من الوزاره او من شغل الاستشارات و الاستراتيجيه..
الحلم قرب يا جماعة ❤️
بس اتذكر الخصوصيه برضو 😅
#حنبنيهو
نحن طلبه و ودونا للاسود في حديقه 6 أبريل(ما كانو هياكل عظمية) عشان نكشف عليهم و كده
اها الدكتور خدر الأسد من بعيد و دخل عليه غطأ عيونو ذي ديل ودخلنا القفص كتار كده قوم يالاسد اعطس ولا هضرب كده و نام تاني
اقسم بالله الناس دي جري جد يقعو يقومو و اتكابسو في الباب ذي فلم الكرتون 😂
الزولة البتساعدنا في شغل البيت قالت لزوجتي و الله انا دايره زياده قروش لكن ياهو شايفه راجلك قاعد في البيت بلا شغل خجلت اقول دايره زياده في ظروفكم دي...
الله يجازي الكورونا جابت لينا الكلام
😂😂😂🙊🙊🙊
اول عربيه اشتريتها بقروشي... كنت مظبطها شديد و مسجل و سماعات ظابطه و دركسون و كراسي سبورت و بوري سته نغمات ذي بتاع الباصات البيعمل صدى داك...
و كنت عامل ليها نظام بتدور برموت كنترول... اي و الله
كنت بحبها جدا و الله
I miss it 🥺
ما تقلقو…
لو حاسي بحياتك جايطه و انه ما عارف ماشي وين في عشريناتك عادي جدا عشان كل زول في عشريناتو ما عارف لسه… حتى القايل روحو عارف بيغير رايو وفهمو مع التجارب و الزمن…
ثريد الحكم الاربعينية النسخه ٤٦ 😂
كل سنه و انتم طيبين
اليوم تميت ٤٦ سنه بحمد الله و كرم كبير منه💪🏾
و الحمد لله ربنا حضرني الثورة العظيمة دي و متاكد حننتصر
كعادتي كل عيد ميلاد لي بعد الاربعين بنزل النسخة المنقحة من حكم و نصائح بعدد سنين عمري ممكن تكون مفيده أو ما تهمكم في شي:
لاقيتو قبل سنين في حملة كنا نظمناها لعمل عمليات عيون و علاج العمى في الدندر
قلت ليه أصورك قال لي النعدل العمه
بعد صورتو قال لي السنينات كملن لكن نسوي بيهن شنو ياها ناكل العصيدة و المديدة لكن العوينات مهمات اشوف بيهن بنياتي ديل
عندو طاقة لطيفة
الحمد لله عيونو فتحن بعد العملية
جيت لي فرن اول وصلتهم قام شاب كده لابس كمامه اداني نمره و قال لي امشي اقعد في عربيتك او امشي اقعد في الضل داك بعيد من الناس و لما يجي دورك بنده ليك...
كيفوني و الله في فهم ما بطال...
#كورونا_السودان
انا ببكي عادي و الله... دموع و صوت و نخجي و كل شي... فلم محزن ساي ممكن يبكيني... فيديو من فيديوهات الفيسبوك التعبانة ديك ممكن ادمع... ممكن ابكي براي و ممكن ابكي قدام الناس برضو عادي خالص و ما فوكا اييي شي و مرتاح جدا مع مستوى رجالتي و كل حاجه...
الليله واحده من بناتي الاشتغلو معاي جاتها منحتين كاملات من جامعتين محترمات من امريكا و انا حسه فرحان فرح شديد خالص خالص...
القصه صعبه وسكه طويله بس تمسك فيها بتصل ان شاء الله
في التويته التحت دي سلسلة فيديوهات بتساعد في رحلة الحصول على منحة
بصلح عربيتي في المنطقة الصناعية... الناس دي ما شغاله خالص بموضوع الكورونا ده... شراب من السبيل بنفس علبه الصلصه وياكلو فتة ويحلو باكمبا بالملاعق من نفس الصحن ومره مره زول يعطس يقومو يكوركو ليه كورونا ياااا و يواصلو عادي
قعدت اوعيهم قالو لي يا عمك ما تخليك خواف 🙊
الله يسترنا ساي
امبارح ربنا سهل لي ونسه جميلة و لطيفة مع د اكرم و دكتورة اميرة الاستاذة بالجامعة الأمريكية بمصر... ناس كويسين وبحبو البلد...
برضو ضحكنا مع بعض في اشاعة انه مقبوض في كوبر 😂
العسكري في صمة خشمي وقفني قال لي قطعت الاشاره الحمراء… طبعا يا استاذ دي مخالف الا نمشي القسم… من سوء حظو جاني في يوم قافله معاي (و ده نادر) و ما عندي شي لاحقو… قلت ليه ما قطعتها لكن ارح نشوف فهمك شنو و نمشي القسم… اندهش شويه و قال لي دي طبعا في ٢٤ ساعه حراسه و غرامه.
يكون حركه ممتازه لو حمدوك عمل ذي ما ابي احمد عمل عندنا هنا لما زارنا... و هو راجع من امريكا يغشي مصر و يجيب معاه ولدنا المقبوض في مصر ده و لو معاه آخرون و يجي
تكون حركه قويه و ظابطه
فول من دنقلا و زيت من القضارف وشطه نار و بصله بيضاء و ونسه و ضحك و زراعه مع عوض شكسبير و بكري
ان شاء الله عامرين و ربنا يديم الموده
♥️♥️
@AwadShakespeare
@ThawragySD
لا السودان حيرجع ذي ما كان لا نحن حنرجع ذي ما كنا.
كل شي اتغير وللابد.
اكيد لخير حتى لو ما قادرين نشوف الخير ده حسه
مرات الانكسر لا بتصلح لا شي. نبني جديد و أنسب
ما تقيفو كتير و شوفو حتعملو شنو.
قدام بس
الزولة دي لابسه توبها وذهبها يكشكش و ظاهر انها في منتصف او اخر ثلاثيناتها تقول لسيد المحل مشي (ابوي) ده اول؟
صيرصلي ؟ وصلت كده 😭
انا ماشي اجيب حنه هنديه و البس تيشرتات فيها باتمان خلاص... مافي زول يمسكني قلت ليكم... يا زول فك قبل اعوقك
#اربعيني_ساي
ادروب المعلم ده في صف التوثيق بتاع الخارجيه بيبيع شاي ساده و شاي بلبن و قهوه ساده و قهوه بلبن و فطور ثلاثه انواع سندويتشات و بسكويت و رصيد سوداني و رصيد زين و بيوريك تقيف في الصف وين و يشرح الاجراء كمان 😍
Full service
الشيء المؤكد انه القرض مضاد البكتريا و الفيروسات..
دفعتي عملت فيه دكتوراه عديل...
ما بالضروره طبعا يكون بيشتغل في الكورونا لكن اهو الناس تجرب... انا شخصيا مجربو كتير في التهابات الحلق و نتايجو سحريه عديل... حتى بناتي عودتهم عليه...
قرضتين في الخشم و مصها...
#كرونا_السودان
بتي الصغيره نور وفي اثناء ما نحن كنا بنتضاير في الشارع من التروس قالت لي (باهتمام كده) هي يا بابا فايدتها شنو؟
قلت ليها دي طريقه للاحتجاج و الضغط و عشان الحكومه تسمع كلامهم ومطالبهم
سكتت مسافه فكرت و قالت لي طيب ما يمشو يترسو محل الحكومه قاعده موش احسن؟
انا: تاكلي ايسكريم؟
انا في السفر بلبس مريح كده... امبارح جيت من الفندق نزلت من الليموزين قام الشاب المصري البينزل الشنط سأل السواق قال ليه امال فين القيست؟ و انا واقف جمبو... قام السواق و قال ليه اهو... الزول اندهش كده و قال معليش يا بيه موش شكلك قيست 😂😂😂
ما اديتو بقشيش الكلب
غايتو يا جماعه النصيحه يعني... هذه الحكومة مرت و بتمر بتحديات ما حصلت لاي حكومة اظن من زمن الإنجليز... شي حمى كنكشة ديك و بعدها كورونا و شي فيضانات و شي مشاكل قبلية و دولة عميقة و معارضة و شي فلس شديد و شي امريكا تساوم فينا و شي ازمات وقود و اقتصاد منتهي
#تحديات_الفتره_الانتقاليه
سلطة البندوره الطازجة و البصل الأبيض بصوص الليمون و زبدة الفول السوداني مع رشة ملح و فلفل احمر مطحون و القليل من زيت السمسم الفريچن... تؤكل مع خبز الزرة الرفيعة الخفيف الطازج الخالي الغلوتين
و الله ما بنعرف نسوق ساي 😂😂
حتى لو حسيت بزمن كتير ضاع... برضو ما تقيف... حتى لو مشيت في سكه مسافه طويله و احتجت تغيرها غيرها و ما تقيف... لو حتبدا تاني برضو ما تقيف عشان انت في الحقيقه ما بادي من الصفر... ممكن توقف بس ما توقف كتير وقبل تجري سريع حتمشي بخطوات خايفه و متردده بس ما تقيف... امشي قدام قدر تقدر
يا جماعة حقيقة مفروض نغير من مليونيات القصر دي… الحته دي حبستها و حصارها ساهل و القوات الأمنية حفظتها خلاص و عرفو دروبها كلها… يا ريت الناس تسمع كلامي و تشوف طريقه و مكان تاني
#الردة_مستحيلة
سمعت كم مره كم زول مقلق من انه حيبدا من الصفر تاني.
يا قوم مافي زول بيبدا تاني من الصفر.
الصفر ده كان زمان قبل ما تبدا.
حسه في خبره و مهارات و علاقات و تجارب لسه موجوده.
سواء كنت شغال براك او عاوز ترجع وظيفتك او ماشي وظيفه جديده او مجال جديد او بلد جديده. عندك الرصيد ده كلو