.
.
عديتها من طيب راسي وانا اخوك
ماني مدقق في علومٍ دقاقه
ندري عن اللي يزرع بدربنا شوك
نجامله من شان بعض الرفاقه
ماناخذ اهل الطيب بسوات صعلوك
من شان عين الطيب تكرم علاقه
:
.
الله يبعد خوتك " يابو وجهين
وجهٍ لنا والوجه الاخر علينا ..
ان جيتنا سمعتنا المنطق الزين
وان رحت منا بالحكي تقتفينا
حنا بفضل اللي خلقنا غنيين
بوجيهنا والا بمدة يدينا ..
من اول نحسبك طيب وهالحين
الله يرفع عنك .. ولا يبتلينا ..
بعض الرجال عقولهم في روسهم
وبعض الرجال عقولهم مستاجره
خشم الريال يحوسهم ويدوسهم
تقدر تحولهم طيور مهاجره
لاتامن اللي يطرحون نفوسهم
ترى ضعيف النفس مثل الفاجره
صدورنا ماهيب دايم رحيبه
ياللي زعلت من الكلام الصحيح ارض
نصمت عن اللي فيه شكه وريبه
خبلٍ اليا سمع السوالف دخل عرض
سوالفه مابين نمّه وغيبه
اما شذب عرقوب والا هتك عرض
ونمسح خطا الطيب على شان طيبه
والا الردي لا اخطا مسحنا به الارض
ياكثر مانعطي ولا ننتظر رد
وننسى عطايانا ليا من عطينا
قلوبنا ماتعرف الحقد والصد
ونطّيب باللي مايطيبون فينا
ونحب لكن فالمحبه لنا حد
لاوصلت حد الكرامه مشينا
وان ضاقت الأيام نوقف لها ند
نضحك لها من قبل تضحك علينا
.
.
حاول تعود على التطنيش
صمتك عن الناقص يهينه
لايشغلك من يهز الريش
اغلب طيور البلد زينه
امسح على روسها بشويش
ضعوف الاجواد مسكينه
كم واحدٍ مايبيك تعيش
لو ان الاعمار .. بيدينه
.
.
البارحه والصدر ضايق ومهموم
ولعت من عقب الزقاره زقاره
حتى حبوب النوم ماجابت النوم
والقلب ماهدت لواهيب ناره
في صدري علوم وفي قلبي علوم
واول تسابيب الحرايق شراره
سكوتي عن الزلات ماهو سكوت الخوف
وانا اقدر على تلجيم الافواه واحكاها
تشيمت والزله ليا جت على المكشوف
ليا وحيتها سويت ماني بوياها
على سلمنا المتوارث الواضح المعروف
تعلمت اهمشها كذا واتناساها
انا من كثر ما اشوف كني ماعاد اشوف
تعرض علي المخطيه واتعداها
:
.
عادت اعياد الطيبين من العباد
اهل النبا المحمود والقدر الرفيع
واشكر من ارسل من معزه واجتهاد
على الاقل ارسل حسب مايستطيع
يكفيني انه مانساني في الاعياد
حتى ولو ان الرساله للجميع
:
.
صايمٍ من عام عن بعض الوجيه
اللي لا اقبل وجهه فكنه قفاه
بعضهم لحم الاوادم يشتهيه
صام عن زاده ولا خلا رداه
صوم يا ابن آدم عن العرض النزيه
من تبلا الناس بيموت بلاه ،،،
الله اللي فوق ماتضحك عليه
لاتزود في الكلام وفي الوصاه